Мерекелік демалыс күндері Алматы облысының әкімдігі мен бір топ инвесторлар арасында Ой-Қарағай шипажайын дамыту жобасына қажетті жағдайлар жасау және қолдау көрсету туралы Меморандумға қол қою ресми рәсімі өтті.
Қол жеткізілген уағдаластықтардың аясында 2028 жылға дейін тау курортын кеңейту, атап айтқанда аспалы жолдар салу, шаңғы трассаларының ұзындығын ұлғайту, еңістерді, парапландар, глампинг алаңдарын жабдықтау, мейрамханалар, көлдер мен этноқалашық салу жоспарлануда.
Жобаны жүзеге асыру барысында Алматы облысы әкімінің орынбасары Рустам Исатаев баяндағандай, негізгі үш бағыт бойынша мемлекеттік қолдау шаралары белгіленді. Оның айтуынша, облыс басшылығы инженерлік-көліктік инфрақұрылыммен қамтамасыз етуге, сондай-ақ әкімшілік қолдау көрсетуге дайын.
Облыс әкімінің орынбасары Рустам Маратұлы аталған меморандум бойынша берген сұхбатында: «Қол қойылған меморандум аясында инженерлік инфрақұрылымды жақсарту, атап айтқанда 15 МВт қосымша электр қуатымен қамтамасыз ету, тау бөктерінде жасанды қар жасау үшін сумен жабдықтау жүйесін кеңейту бойынша маңызды жұмыстарды жүргізу жоспарлануда. Жылына 100 мың текше метрге дейін, сондай-ақ тұрмыстық қажеттіліктер үшін тәулігіне 700 текше метрді қамтамасыз етеді. Тағы бір маңызды қадам – газ құбыры учаскесін оның өткізу қабілетін сағатына 1000 текше метрге дейін арттыра отырып, қайта құру. Сонымен қатар, Байбұлақ ауылынан Ой-Қарағайға дейін жүк және жолаушылар тасымалы жолын салу жобасы жүзеге асырылады. Ал соңғы, бірақ маңызды қадам – жарықтандыру орнатылып, өткізу қабілетін арттыра отырып, Талғар трактісі – Ой-Қарағай жолын қайта жаңғырту», – деді.
Сөз соңында облыс әкімінің орынбасары өңірдегі туризм саласын дамытудың бірінші кезектегі маңызына тоқталды. Ол өңірдің зор әлеуетін ескере отырып, туризмді дамыту жалпы ілгерілеудің негізгі факторына айналатынына сенім білдірді. Туризмге құйылған инвестиция мен көңіл осы саланың өркендеуіне ықпал етіп қана қоймай, өңірдің жалпы экономикалық және әлеуметтік дамуына да игі ықпал ететіні туралы айтты.
2023 жылдың 11 айындағы жағдай бойынша туризм секторындағы негізгі капиталға салынған инвестиция 51 млрд теңгені құрады, қызметкерлерді тарту 1750 адамды құрайды.
Алматы облысында туризмді дамытуға 58 млрд теңге инвестиция тартылады
![](https://atamekengazeti.kz/wp-content/uploads/2024/01/218a800c-a921-4538-9380-7450349f2945.jpeg)