Site icon ATAMEKEN

АТА ЗАҢ – АДАЛ ҰРПАҚ ТӘРБИЕСІНІҢ НЕГІЗІ

Конституция – мемлекеттің тірегі, қоғамның тұрақтылығы мен ел бірлігінің кепілі. Ол әрбір азаматтың құқығы мен бостандығын айқындап қана қоймай, ұрпақ тәрбиесінде де маңызды орын алады. Өйткені заңды құрметтеу, өз құқығын білу, өзгелердің құқығына қол сұқпау сияқты ізгі қасиеттер бала бойына кішкентай кезінен бастап қалыптасуы тиіс.

Бұл бағытта мектепке дейінгі тәрбие мен білім беру ұйымдарының атқаратын рөлі ерекше. Балабақша – баланың қоғамдық ортаға бейімделіп, алғашқы адамгершілік құндылықтарды бойына сіңіретін маңызды орта. Сондықтан бүлдіршіндерге Конституцияның мән-маңызын жас ерекшелігіне сай түсіндіру, Отанға деген сүйіспеншілігін арттыру, достыққа, сыйластыққа және жауапкершілікке баулу – тәрбие жұмысының негізгі бағыттарының бірі.

Балабақшада балаларға заң мен тәртіпті құр сөзбен түсіндірумен шектелмей, күнделікті іс-әрекет арқылы үйретудің маңызы зор. Мәселен, ойын барысында бір-бірінің кезегін күту, ортақ ойыншықтарды бөлісу, достарын құрметтеу, үлкендердің сөзін тыңдау, айналасына қамқорлық таныту арқылы бала әділдік пен тәртіптің мәнін түсіне бастайды. Сонымен қатар тақырыптық әңгімелер, танымдық ойындар, сурет салу және шығармашылық тапсырмалар арқылы бүлдіршіндердің құқықтық сауаттылығының алғашқы негіздері қалыптастырылады.

Конституцияда бекітілген білім алу, денсаулық сақтау, демалу және қорғалу құқықтары әрбір баланың бақытты балалық шағының негізі болып саналады. Ал осы құқықтардың сақталуына ата-ана, тәрбиеші және қоғам бірлесе жауапты. Балаға қамқорлық жасау, оның қауіпсіздігін қамтамасыз ету, пікірін тыңдау мен жеке тұлға ретінде қалыптасуына жағдай жасау – ортақ міндет.

Бүгінгі бүлдіршін – ертеңгі ел азаматы. Сондықтан баланың бойына адалдық, әділдік, отансүйгіштік, жауапкершілік пен өзара құрмет қасиеттерін сіңіру арқылы біз құқықтық мәдениеті жоғары, саналы ұрпақ тәрбиелей аламыз.

Ата Заңды құрметтеу – Отанды құрметтеуден басталады. Ал Отанға деген сүйіспеншілік отбасында, балабақшада берілген тәрбиеден қалыптасады. Ендеше, Конституция құндылықтарын ұрпақ санасына сіңіру – жарқын болашаққа жасалған маңызды қадам.

Exit mobile version