Алкоголь – қауіпті әрі жасырын жау. Ол адамның денсаулығын бұзып, отбасын ажыратып, өмірлік мақсаттардан айырады. Көбіміз оны «күйзелістен арылу» немесе «демалу» деп атаймыз. Бірақ шын мәнінде алкоголь ешқашан проблеманы шешпейді – ол оны тек уақытша жасырады, ал кейін одан бетер нашарлатады.
Алкоголизм бір күнде пайда болмайды. Ол бірте-бірте, байқамай өсіп, адамның өмірін басып алады. Алдымен – «мерекеде бір-екі стакан», сосын – «жұма кешіндегі бір бөтелке пиво», содан кейін – күнделікті әдет. Адам өзіне-өзі: «Кез келген уақытта тастаймын» дейді. Бірақ күн өткен сайын оған бұл оңайырақ болмайды.
Профилактика – бұл тек тыйым салу емес. Бұл – адамға алкогольсіз де өмір қызықты және мағыналы екенін көрсету. Спорт, шығармашылық, саяхат, отбасымен уақыт өткізу, сүйікті іспен айналысу – осының бәрі алкогольдің орнын басып, адамды толыққанды өмірге жетелейді.
Балалар мен жасөспірімдерге ерекше мән берілуі керек. Олар біздің сөзімізді емес, ісімізді көреді. Егер олар ата-анасының салауатты, белсенді, мақсатты өмір сүргенін көрсе, олар да сол үлгіні ұстанады. Егер олар алкогольді «қалыпты жағдай» ретінде көрсе, олар да сол жолға түседі.
Таңдау әркімнің өз қолында. Сіз арақ ішіп, уақытты босқа өткізіп, денсаулығыңызды жоя аласыз. Немесе саналы, белсенді, ұзақ өмірді таңдай аласыз. Алкогольсіз өмір – бұл таза сана, күшті денсаулық және шынайы эмоциялар.
Бүгін дұрыс таңдау жасаңыз. Өз болашағыңыз бен жақындарыңыздың болашағы үшін.