Грек-рим күресінен Қазақстан Республикасының еңбек сіңірген жаттықтырушысы, «Парасат» орденінің иегері Боранбек Қоңыратов республикалық референдумға қатысып, өз таңдауын жасады.
Тәжірибелі бапкер дауыс беру учаскесіне келіп, ел үшін маңызды қоғамдық-саяси науқанға азаматтық жауапкершілікпен қатысатынын жеткізді. Ол референдум – халықтың еркін білдіретін және мемлекет дамуының маңызды бағыттарын айқындайтын маңызды демократиялық тетік екенін атап өтті.
Боранбек Қоңыратов – қазақстандық спорттың дамуына зор үлес қосып жүрген білікті мамандардың бірі. Оның шәкірттері халықаралық жарыстарда ел намысын абыроймен қорғап келеді. Соның ішінде оның жетекшілігімен дайындалған спортшылардың бірі – 2024 жылы Парижде өткен жазғы Олимпиада ойындарының күміс жүлдегері Демеу Жадраев. Бұл жетістік қазақстандық грек-рим күресінің жоғары деңгейін көрсетіп, отандық спорттың әлеуетін халықаралық аренада тағы бір мәрте дәлелдеді.
Жаттықтырушының айтуынша, ел болашағына қатысты маңызды шешімдер қабылданатын сәтте әрбір азаматтың белсенділігі ерекше маңызға ие.
«Бүгін мен азаматтық борышымды орындап, референдумда өз таңдауымды жасадым. Мұндай маңызды саяси науқандарға қатысу – әрбір азаматтың жауапкершілігі. Өйткені еліміздің болашағы бәрімізге ортақ», – деді Боранбек Қоңыратов.
Ол сондай-ақ қоғамның барлық мүшелерін ел тағдырына бейжай қарамай, қоғамдық-саяси өмірге белсенді қатысуға шақырды. Оның пікірінше, азаматтардың бірлігі мен жауапкершілігі мемлекет тұрақтылығы мен дамуының маңызды кепілі болып табылады.