Әсет Бейсеуов атындағы орта мектептің 10 «Ә» сынып оқушыларымен «Жас шекарашы» клубы аясында құқықтық сауаттылықты арттыру, патриоттық тәрбие беру, командалық жұмыс пен практикалық дағдыларды қалыптастыру бағытында бірқатар танымдық және спорттық-қолданбалы сабақтар өткізілді.
Іс-шаралардың негізгі мақсаты – оқушылардың құқықтық білімін жетілдірумен қатар, олардың жауапкершілік, ұйымшылдық, өзара көмек, байқампаздық және жергілікті жерде бағдарлау қабілеттерін дамыту.
Алғашқы сабақ «Қазақстан Республикасының Конституциясы – мемлекеттің негізгі заңы» тақырыбына арналды. Құқықтық тәрбие бағытындағы сабақ оқушылардың жас ерекшеліктеріне сай, қолжетімді әрі ойын түрінде ұйымдастырылды. Сабақ барысында «Құқықтар мен міндеттер» ойыны өткізіліп, оқушылар Қазақстан Республикасы азаматтарының негізгі құқықтары мен міндеттері туралы білімдерін бекітті. Ойын барысында оқушылар өз құқықтарын білумен қатар, қоғам алдындағы жауапкершіліктің де маңызын түсінді.
Келесі сабақ «Төзімділік және командалық жұмыс дағдылары» тақырыбында спорттық-қолданбалы бағытта өткізілді. Сабақтың негізгі мақсаты – оқушылардың командалық өзара іс-қимылын, өзара көмек көрсетуін, жауапкершілігін және ұйымшылдығын қалыптастыру. Осы мақсатта «Біріміз – бәріміз үшін» тренингі мен «Қағаздан мұнара» жаттығуы ұйымдастырылды. Тапсырмаларды орындау барысында оқушылар бір-бірімен ақылдасып, ортақ шешім қабылдап, командалық жұмыстың нәтижеге жетудегі маңызын тәжірибе жүзінде көрсетті.
Үшінші сабақ «Іздер және жергілікті жерде бағдарлау» тақырыбына арналды. Өлкетану элементтері қамтылған практикалық сабақ ойын түрінде ұйымдастырылды. Оқушылар үшін жергілікті жердегі квест және «Із кесуші» ойыны өткізілді. Практикалық тапсырмалар олардың қоршаған ортаны мұқият бақылауына, бағытты анықтауына, логикалық ойлауына және топпен бірлесе әрекет етуіне мүмкіндік берді.
Аталған іс-шаралар барысында Әсет Бейсеуов атындағы орта мектептің 10 «Ә» сынып оқушылары белсенділік танытып, тапсырмаларды қызығушылықпен орындады. Сабақтар оқушылардың тек теориялық білімін арттырып қана қоймай, күнделікті өмірде қажет болатын жауапкершілік, тәртіп, өзара көмек, ұйымшылдық және шешім қабылдау дағдыларын қалыптастыруға ықпал етті.
«Жас шекарашы» клубы – жас ұрпақтың бойында Отанға деген сүйіспеншілікті, азаматтық жауапкершілікті, тәртіптілік пен командалық рухты қалыптастыратын маңызды тәрбие алаңы. Осындай мазмұнды іс-шараларды жүйелі түрде өткізу оқушылардың жан-жақты дамуына және болашақта ел қауіпсіздігіне жауапкершілікпен қарайтын саналы азамат болып қалыптасуына негіз болады.