Мемлекет пен қоғам – үздіксіз қозғалыстағы, дамып-өркендеп отыратын тірі ағза іспетті. Соған сай елдің құқықтық кеңістігі де заман ағымына, уақыт талабына қарай жаңарып, жетіліп отыруы – заңды құбылыс. Соңғы енгізілген заңнамалық өзгерістер – еліміздің әділеттілік пен тұрақтылықты ту еткен жаңа саяси-құқықтық белеске қадам басқанының айқын көрінісі. Бұл реформалардың өзегінде азамат пен мемлекет арасындағы сенімді нығайту, халықтың әл-ауқатын арттыру және елдің ішкі-сыртқы қауіпсіздігін берік қамтамасыз ету идеясы жатыр.Мемлекеттік басқару жүйесіндегі басты жаңалық – халық үнінің билікке жетуін жеңілдететін, шешім қабылдау процесін ықшам әрі тиімді ететін жаңа заңнамалық модельге өтуі болды. Осыған дейінгі қос палаталы жүйеден бір арнаға тоғысқан, тұтас өкілді орган – Құрылтай институтына көшу арқылы заң шығару процесінің жеделдігі мен жауапкершілігі артты. Стратегиялық мәселелерде қоғамдық келісімді сақтау және халықтың әртүрлі өкілдерінің пікірін ескеру үшін Қазақстан Халық Кеңесіне заңнамалық бастамалар ұсыну мәртебесі берілді. Сонымен бірге, билік тармақтарының үйлесімді жұмысын қамтамасыз ету мақсатында Вице-президент институты бекітілді.Кез келген заңның қайырымдылығы – оның қарапайым азаматтың мүддесін қаншалықты қорғай алатындығында. Интернет пен заманауи технологиялар қарқынды дамыған дәуірде азаматтардың дербес деректерін қорғау тетіктері конституциялық деңгейде шегеленді. Ошақ бұтының бүтіндігі мен ғасырлар бойы қалыптасқан отбасылық құндылықтарды сақтау мақсатында неке институты еркек пен әйелдің ерікті, тең құқылы одағы ретінде нақтыланды. Сондай-ақ еңбек қатынастарын азаматтық-құқықтық келісімшарттармен жасыруға шектеу қойылып, еңбек адамының әлеуметтік кепілдіктері мен заңды құқықтарын қорғау қатаңдатылды.
Әділетті қоғам тек құқықтардан ғана емес, сонымен бірге азаматтық міндеттерден де құралады. Қоршаған ортаны қорғау, табиғат байлығын келешек ұрпаққа аманаттап тапсыру – әрбір азаматтың қасиетті парзы ретінде айқындалып, волонтерлік пен қайырымдылық қозғалысына мемлекеттік қолдау күшейтілді. Ал бұқараның қауіпсіз әрі жайлы ортада өмір сүруін қамтамасыз ету үшін тұрғын үй мен ғимараттардың сапасын, әсіресе сейсмикалық қауіпсіздік талаптарын арттыратын бірыңғай ережелер енгізілді. Қаржылық салада ұлттық байлықтың шетелге заңсыз кетуіне тосқауыл қойылып, сот орындаушылар мен қарыздарды өндіру жүйесіне ашықтық пен цифрлық бақылау енгізілді.Заң – қоғамның темірқазығы. Енгізілген бұл өзгерістердің түпкі мақсаты – елдегі құқықтық тәртіпті орнықтыру, әрбір азаматтың ертеңгі күнге деген сенімін нығайтып, мемлекетіміздің тұрақты дамуына даңғыл жол ашу.
Әйгерім ӘБУ,
“Атамекен” газетінің бас редакторы.