Елімізде жақын күндері жаңартылған Конституцияның ережелері толыққанды күшіне енеді. Бұл маңызды құжат Қазақстанның одан әрі демократиялық дамуына серпін беріп, азаматтардың құқықтары мен бостандықтарын қорғауды мемлекеттік саясаттың басты басымдығы ретінде айқындайды.
Ата Заңның негізгі қағидаттарының бірі – адам және оның өмірі, құқықтары мен бостандықтары мемлекеттің ең жоғары құндылығы болып саналатыны. Бұл норма мемлекеттік билік органдарының қызметі ең алдымен азаматтардың мүддесін қорғауға, олардың әл-ауқатын арттыруға және өмір сүру сапасын жақсартуға бағытталуы тиіс екенін көрсетеді.
Конституциялық өзгерістер мемлекеттік басқару жүйесін жетілдіруге, заң үстемдігін нығайтуға және қоғамдағы әділдік қағидаттарын орнықтыруға мүмкіндік береді. Сонымен қатар азаматтар мен мемлекет арасындағы өзара жауапкершілік пен сенімді арттыруға жол ашады.
Жаңа Конституция құқықтық мемлекетті қалыптастыру бағытындағы маңызды қадамдардың бірі болып саналады. Оның негізгі мақсаты – әрбір азаматтың құқығын қорғауды күшейтіп, қоғамдық тұрақтылық пен елдің орнықты дамуын қамтамасыз ету.
Айта кетейік, 5 маусым күні Мемлекет басшысы Конституцияның жаңа нормаларын іске асыру мақсатында бес конституциялық заңға қол қойды. Бұл құжаттар Ата Заңда белгіленген реформаларды кезең-кезеңімен жүзеге асыруға және құқықтық жүйенің тиімділігін арттыруға бағытталған.