Қазіргі таңдағы мәселелердің бірі – қоғамдағы сыбайлас жемқорлықтың белең алуы. Ол ел болашағына, ұлттық қауіпсіздікке мейлінше зиянын тигізеді. Яғни, осы келеңсіз құбылыспен күресу – барша халықтың алдында тұрған ортақ мәселе.
Біздің ел – шет елдердің ішіндегі сыбайлас жемқорлыққа қарсы күрес туралы арнайы заң қабылдаған бірінші және бірден-бір мемлекет. Мемлекеттік органдардың осы бағыттағы жұмысының нысандылығы мен тиімділігі, сыбайлас жемқорлыққа қарсы күрес мәселелері Президенттің жеке бақылауында тұр. Жалпы сыбайлас жемқорлықпен күресу жеке адамдардың немесе жекелеген топтың ғана емес мемлекеттік органдардың, мемлекеттік қызметкерлердің, тұтастай қоғамның басты міндеті мен борышы. Осыны шынайы орындау үшін әрбір лауазым иесі өзінің жан дүниесін ұдайы таза, адал ұстауы керек. Сонда ғана олар қарапайым халықтың сенімін ақтап, қоғамның дамуына үлес қосатын болады.
Әрине, сыбайлас жемқорлық дәрі беріп емдейтін сырқат емес. Сыбайлас жемқорлық әрекеттері бойынша тиісті шара қолданудың негізі – ол азаматтардың арыз-шағымы. Мемлекеттің әрбір азаматы Қазақстан Республикасының Конституциясын және заңдарын сақтауға, басқа адамдардың құқықтарын, бостандықтарын, абыройы мен қадір-қасиетін құрметтеуге міндетті. Шынында да, біз әділ төрелік жасап, жемқорлықтан жоғары тұрған жағдайда ғана халық сеніміне ие боламыз.
Қазақстан жемқорлығы жоқ мемлекет құруды көздегендіктен, жемқолыққа қарсы іс-қимыл саясатын жүргізуде. Оның негізгі мақсаты ашық мемлекет, кәсіби мемлекеттік аппаратты құру, заңның үстемдік құруын қамтамасыз ету, бизнестің дамуына жағдай жасау болып табылады.
Осыған байланысты «Жемқорлыққа қарсы іс-қимыл туралы», «Қоғамдық кеңестер туралы», «Ақпараттандыру туралы» заңдар қабылданды. Сондай-ақ, «Ашық үкімет» жүзеге асуда, онда мынадай өзекті мәселелер қарастырылады: Ашық бюджет – бюджеттен жұмсалған қаражатқа қоғамдық бақылау жүргізу үшін азаматтарға ерік беріледі. Ашық мәліметтер – мемлекеттік органның жұмысы туралы мәліметтер қоғамға қолжетімді. Сыбайлас жемқорлықпен күресудің ең тиімді құралдарының бірі автоматтандыру болып табылады. Бұл адам факторын болдырмауға мүмкіндік береді. Еліміздегі барлық қызмет көрсету салалары толығымен электронды қызмет көрсетуге көшкен жағдайда, қызмет көрсетудің тиімділігі артып, тұрмыстық деңгейдегі сыбайлас жемқорлық қысқара түседі.
Сыбайлас жемқорлыққа қарсы іс-қимылда қоғам мен мемлекет бірігуі тиіс.Сонда ғана сыбайлас жемқорлық азаяды. Елімізде қазіргі таңда сыбайлас жемқорлыққа қарсы жүргізіліп жатқан саясатты қазынашылық ұжымымен бірге қолдаймын. Себебі әрбір мемлекет өзін бәсекеге қабілетті ел ретінде тану үшін тазалықты түп-тамырдан бастауы керек. Үкімет саясатының арқасында қазіргі таңда елімізде жемқорлық түбірімен жойылмаса да, азайды деп санаймын.
А.Әшіров,
Жамбыл аудандық қазынашылық басқармасының басшысы.
