Ұлыбритания премьер-министрі Кейр Стармер үкіметтің өмірін аяқтағысы келетіндерге көмек көрсету туралы заң жобасын толық көлемде жүзеге асыруға дайын екенін мәлімдеді. Бұл мәлімдеме денсаулық сақтау министрі Уэс Стритингтің сөздерінен кейін айтылды. Ол жаңа заңды жүзеге асыруға қаржы қарастырылмағанын және алдымен паллиативтік көмекті жақсарту қажет екенін алға тартқан еді.
Уэс Стритинг бұған дейін эвтаназияны қолдаған, бірақ кейін пікірін өзгерткен. Ол Facebook парақшасында бұрынғы премьер-министр Гордон Браунның эвтаназияға қарсы пікірін қолдап, этикалық мәселелер мен қаржы тапшылығын алға тартты.
«Мұндай жүйені құруға уақыт пен қаражат керек. Бұл қызметті енгізу – жай ғана экономикалық есеп емес, бұл адамның өмірі мен қадірі туралы мәселе», – деп жазды Стритинг.
Алайда, премьер-министр Стармер бұл пікірмен келіспейтінін білдіріп, үкіметтің заң жобасын жан-жақты дайындықпен жүзеге асыруға ниетті екенін айтты. НАТО саммиті алдында журналистердің сұрағына жауап берген ол:
«Біздің міндетіміз – бұл заңның барлық аспектілерімен іске асуын қамтамасыз ету. Мен бұл бағытта қажетті дайындықтар жасалды деп сенемін», – деді.
Заң жобасы не жайлы?
Жаңа заң жобасы Англия мен Уэльстегі емделмейтін ауруға шалдыққан ересек адамдарға, егер өмір сүру мерзімі алты айдан аспаса, дәрігерлік көмекпен өмірін аяқтауға мүмкіндік береді.
Шешімді:
-
екі тәуелсіз дәрігер,
-
бір әлеуметтік қызметкер,
-
білікті заңгер мен психиатрдан құралған комиссия мақұлдауы тиіс.
Заң жобасын парламентке депутат Ким Лидбитер ұсынды, ал Лордтар палатасында оны лейборист Чарли Фалконер қолдап, әрі қарай ілгерілететін болады.
Фалконер Лордтар палатасын бұл заңды саяси айлалармен бөгемеуге шақырды.
