Жамбыл аудандық кітапханасы мен Бауыржан Момышұлы атындағы 28237 әскери бөлім арасында өзара ынтымақтастықты нығайтуға бағытталған меморандумға қол қойылды. Маңызды құжаттың мақсаты – мәдени-ағартушылық бағыттағы жұмыстарды дамыту, рухани құндылықтарды дәріптеу, кітап оқу мәдениетін қалыптастыру және патриоттық тәрбиені кеңінен насихаттау.
Кітап – адамзаттың рухани қазынасы, білім мен тәрбиенің қайнар көзі. Әсіресе, ел тыныштығы мен қауіпсіздігін күзетіп жүрген әскери қызметшілер үшін тарихи сананы қалыптастыру, ұлттық мұраны тану және отансүйгіштік қасиеттерді нығайту айрықша маңызға ие. Осы тұрғыдан алғанда, кітапхана мен әскери бөлім арасындағы ынтымақтастықтың мәні зор.
Меморандум аясында тараптар бірлескен мәдени және танымдық іс-шаралар ұйымдастыруды көздейді. Атап айтқанда, кітап оқуға қызығушылықты арттыру, қазақ әдебиеті мен тарихи шығармаларды насихаттау, ұлттың біртуар тұлғаларының өмірі мен өнегесін таныстыру, сондай-ақ жас ұрпақ пен әскери қызметшілердің тарихи-танымдық білімін жетілдіру бағытында жұмыстар жүргізу жоспарлануда.
Сонымен қатар, мұндай бастамалар ұлттық құндылықтарды ұлықтауға, ел тарихына деген құрметті арттыруға және өскелең ұрпақтың бойында отансүйгіштік сезімді қалыптастыруға ықпал етеді. Әсіресе, қазақ халқының әдебиеті мен тарихын танытатын тағылымды кездесулер, кітап көрмелері, әдеби кештер мен танымдық шаралар арқылы оқырмандардың рухани дүниесін байытуға мүмкіндік мол.
Жамбыл аудандық кітапханасы мен әскери бөлімнің өзара байланысы мәдени-ағартушылық жұмыстың аясын кеңейтіп қана қоймай, кітапхана мен әскери орта арасындағы рухани байланысты нығайтуға жол ашады. Бұл – білім мен тәрбиені, ұлттық сана мен азаматтық жауапкершілікті ұштастыратын игі бастама.
Рухани құндылықтарды сақтау мен насихаттау – баршамызға ортақ міндет. Осы бағыттағы жүйелі ынтымақтастық алдағы уақытта да жалғасын тауып, кітап оқуға деген қызығушылықты арттыруға, ел тарихын құрметтейтін әрі туған жеріне жанашыр азаматтарды тәрбиелеуге өз үлесін қосады деген сенім мол.
Кітап пен руханиятты тоғыстырған ынтымақтастық
