Халық кеңесі азаматтардың мемлекеттік шешімдер қабылдау үдерісіндегі үнін күшейтеді
Азаматтар Халық кеңесі арқылы заң қалыптастыру ісіне белсенді қатысады
Конституциялық комиссияның екінші отырысы аясында Парламент Сенатының депутаты Нұрлан Бекназаров Қазақстанда өкілді билікті нығайтуға және демократиялық институттарды дамытуға бағытталған негізгі бастамалар туралы баяндады.
Оның айтуынша, ұсынылып отырған өзгерістер өкілді биліктің тиімді моделін қалыптастыруға және елдегі жаңа саяси тепе-теңдікті орнатуға мүмкіндік береді.
«Жоғары өкілді орган — Құрылтайдың рөлі күшейтіледі, палаталарды біріктіру конституциялық жолмен жүзеге асырылады, билік тармақтары арасындағы өкілеттіктер қайта бөлінеді. Бұл өкілді биліктің тиімді моделін қамтамасыз етіп, жаңа саяси теңгерім жүйесін қалыптастырады», — деді Нұрлан Бекназаров.
Сенат депутаты Мемлекет басшысының жаңа консультативтік орган — Халық кеңесін құруды ұсынғанын атап өтті. Бұл кеңес құрамына қоғамдық бірлестіктер, мәслихаттар, өңірлік кеңестер мен этномәдени орталықтар енетін болады.
Бекназаровтың айтуынша, Халық кеңесі Қазақстан халқы Ассамблеясы мен Ұлттық құрылтайдың құқықтық мирасқоры болып, оның қызметі Конституциялық деңгейде бекітіледі.
Сонымен қатар жаңа органға заң шығару бастамасы құқығы беріледі. Атап айтқанда, заң жобаларын енгізу және республикалық референдум өткізу жөнінде ұсыныс жасау мүмкіндігі қарастырылып отыр. Бұл қоғам мен өңірлердің дамуына қатысты маңызды мәселелерді жедел әрі тиімді шешуге жол ашады.
Аманжолов Нұрмамбет, Дегерес ауылының ақсақалдар кеңесінің төрағасы