Қазақстандық мектеп оқушылары халықаралық білім додаларында тағы бір мәрте жоғары нәтиже көрсетіп, ел абыройын асқақтатты. Шілде айында физика, химия, биология, математика және экономика пәндері бойынша өткен халықаралық олимпиадаларда ұлттық құрама қоржынына жалпы саны 24 медаль түсті.
Ерекше жетістік математика пәні бойынша тіркелді. Қазақстан құрамасы әлемдегі ең беделді білім жарыстарының бірі саналатын 67-ші Халықаралық математика олимпиадасында (IMO) үздік 25 елдің қатарына еніп, жалпыкомандалық есепте 22-орынға тұрақтады.
Биылғы олимпиадаға әлемнің 117 елінен дарынды оқушылар қатысып, өзара бақ сынады. Қазақстан намысын қорғаған ұлттық құраманың барлық алты мүшесі жүлделі орындарға ие болды. Нәтижесінде оқушылар үш күміс және үш қола медаль жеңіп алып, ел қоржынына тағы бір маңызды жетістік қосты.
Халықаралық олимпиадалардағы бұл нәтиже қазақстандық оқушылардың дайындық деңгейінің жоғары екенін және еліміздегі білім беру жүйесінде дарынды жастарды қолдау жұмыстарының нәтижелі жүзеге асып жатқанын көрсетеді.
Жалпы, шілде айында өткен халықаралық пәндік олимпиадаларда қазақстандық оқушылар математика, физика, химия, биология және экономика бағыттары бойынша 24 медаль иеленіп, Қазақстанның зияткерлік әлеуетінің жоғары екенін тағы бір мәрте дәлелдеді.
Мұндай жетістіктер жас таланттардың ғылымға деген қызығушылығын арттырып қана қоймай, еліміздің халықаралық білім кеңістігіндегі беделін нығайтуға да зор үлес қосып отыр.