Қазақстанның құқықтық жүйесін адамға бағдарланған, әділетті әрі тұрақты мемлекет қағидаттарына сай жаңғыртуға бағытталған маңызды қадам болып табылады. Ата Заңда адамның өмірі, ар-намысы мен қадір-қасиетін ең жоғары құндылық ретінде айқындау – мемлекеттің әлеуметтік жауапкершілігін күшейтетін түбегейлі шешім.
Неке мен отбасы құндылықтарының конституциялық деңгейде нығаюы қоғамның рухани және әлеуметтік тұтастығын сақтауда айрықша мәнге ие. Отбасы институтын қорғау арқылы мемлекет ұрпақ тәрбиесіне, қоғамдық тұрақтылық пен демографиялық дамуға берік негіз қалайды. Бұл норма ұлттық дәстүрлер мен жалпыадамзаттық құндылықтардың сабақтастығын айқын көрсетеді.
Адамның жеке басына қол сұқпаушылық, өмір сүру құқығының абсолюттік сипаты, «Миранда ережесінің» бекітілуі және цифрлық дәуірдегі жеке деректерді қорғау мәселелерінің конституциялық деңгейде нақтылануы азаматтардың құқықтық қауіпсіздігін күшейтеді. Бұл – заманауи сын-қатерлерге берілген нақты әрі өзекті жауап.
Сөз бостандығы мен шығармашылық еркіндікке жаңа мазмұн берілуі, зияткерлік меншікті қорғау кепілдіктерінің кеңеюі еркін ойлайтын, жауапты әрі белсенді азаматтық қоғамды қалыптастыруға жол ашады. Мұндай құқықтар демократиялық мемлекеттің ажырамас тірегі екені анық.
Сот жүйесіне қатысты өзгерістер – әділетті сот төрелігін қамтамасыз ету мен судьялар тәуелсіздігін нығайтуға бағытталған маңызды қадам. Адвокатураның құқықтық мәртебесінің Конституцияда жеке баппен бекітілуі азаматтардың кәсіби құқықтық көмекке қолжетімділігін арттырып, құқық қорғау тетіктерінің тиімділігін күшейтеді.
Жалпы алғанда, ұсынылып отырған түзетулер мемлекеттің, қоғамның және азаматтың өзара жауапкершілігін жаңа деңгейге көтеріп, Қазақстанның құқықтық, әлеуметтік және демократиялық даму жолын одан әрі айқындай түседі. Бұл реформа Ата Заңды заман талабына сай жетілдіріп, оның өміршеңдігін арттыруға бағытталған жүйелі қадам деп бағалауға болады.
Абдикеримов Еділ, Ұзынағаш ауылдық округінің ақсақалдар кеңесінің төрағасы.
