Алматы өңірінде бюджеттен тыс қаражат есебінен қиын қолжетімді биік таулы аудандардағы құтқару және профилактикалық жұмыстарға арналған Air 112 тікұшақ алаңы салынды.
«Тікұшақ алаңы құтқарушыларды, мамандарды және қажетті жабдықты биік таулы мореналық көлдерге жедел жеткізуді, сондай-ақ оларды қауіпсіз босату жұмыстарын жүргізуді қамтамасыз етеді. Мореналық көлдерге ұшу уақыты небәрі 10–15 минутты құрайды, бұл төтенше жағдай қатері туындағанда әрекет ету тиімділігін айтарлықтай арттырады», — деді ТЖМ.
Жаңа алаңның мүмкіндіктерімен жұмыс сапары барысында Төтенше жағдайлар министрі Мұрат Мұханов танысты. Ол сондай-ақ сел жағдайына тәулік бойы мониторинг жүргізілетін Аюсай бөгетіне барды.
«Бөгеттің үстінде диспетчерлік пункт жұмыс істейді, онда «Қазселқорғаны» ММ-нің төрт маманы кезекшілік атқарады. Гидротехникалық құрылыс аумағында шолу алаңы да салынған», — деді ведомство.
Болашақта биік таулы авиациялық инфрақұрылымды дамыту, оның ішінде теңіз деңгейінен шамамен 3200 метр биіктікте қосымша тікұшақ алаңын салу жоспарланып отыр.
Фото: ТЖМ
Бізбен бірге болыңыз: Atameken_press
#ТЖМ #Қазселқорғаны #тікұшақалаңы #Аюсай #Алматыоблысы #қауіпсіздік #Қазақстан #жаңалықтар