Венециядағы «ғасыр тойы» және наразылықтар

Бүгіннен бастап Венеция қаласы тек байлар мен атақтыларға арналған көпкүндік мерекенің орталығына айналады. Amazon-ның негізін қалаушы, миллиардер Джефф Безос пен журналист Лорен Санчес отау құрмақ. Алайда, қалыңдықтың және күйеу жігіттің жоспарларына көптеген наразылық білдірушілер кедергі келтіріп, американдық жұпты тойды Венеция орталығынан алыстатуға мәжбүрледі.
Той қарсаңында жас жұбайлар құны 500 миллион доллар тұратын яхтада үлкен «көбік кешін» өткізді. Негізгі мерекелік іс-шаралар үш күнге созылады:
* 26 маусымда Лидо аралында гала-кешкі ас;
* 27 маусымда Венеция Арсеналы ғимаратында неке қию рәсімі;
* 28 маусымда Каннареджо ауданындағы Мизерикордияның ескі мектебінде «үлкен бал» өтеді, онда Леди Гага өнер көрсетеді деп жоспарланған.
Ұйымдастыру және қонақтар
Мерекені ұйымдастыруды Безос пен Санчес кезінде Джордж Клуни мен Амаль Аламуддинге қызмет көрсеткен белгілі лондондық Lanza & Baucina Limited агенттігіне тапсырған. Журналистер «ғасыр тойы» деп атаған бұл салтанатқа жұптың шамамен 10-нан 30 миллион долларға дейін қаражат жұмсайтыны болжануда.
Бюджеттің бір бөлігі, әрине, қалыңдықтың 27 киіміне жұмсалады. Олардың жалпы құны 1,5 миллион доллар болады деп күтілуде. Бұл көйлектерді жасауға Dolce & Gabbana мен Oscar de la Renta дизайнерлері қатысқан. Киім таңдауға қалыңдыққа америкалық Vogue журналының бас редакторы Анна Винтур көмектесті. Сондай-ақ, кешкі ас кезінде бір қонаққа орташа есеппен мың доллар жұмсалатыны айтылады.
Тойға әлемге әйгілі екі жүзден астам кино, шоу-бизнес жұлдыздары және саяси элита өкілдері келеді деп күтілуде. Олардың арасында:
* актерлер Леонардо ДиКаприо, Роберт Паттинсон және Ева Лонгория;
* әншілер Леди Гага мен Кэти Перри;
* аты аңызға айналған Барбра Стрейзанд пен Мик Джаггер;
* блогер Ким Кардашьян анасы Крис Дженнермен бірге;
* америкалық теледидар «королевасы» Опра Уинфри;
* кәсіпкерлер Илон Маск пен Марк Цукерберг;
* АҚШ президентінің қызы Иванка Трамп күйеуімен;
* Иордания патшайымы Рания бар.
Қонақтар үшін Венециядағы бес сәнді қонақүйдің бөлмелері толығымен жалға алынған. Қоғам қаймағының қауіпсіздігін қамтамасыз ету үшін АҚШ-тың бұрынғы теңіз жаяу әскерлері жұмылдырылған.
Қоршаған ортаға әсері және наразылықтар
Жұлдызды қонақтардың келуіне байланысты Венеция әуежайы жеке ұшақтарға, ал айлағы яхталар мен кем дегенде 50 су таксиіне толады. Соңғы күндері олардың сағатына жалға алу құны 400 еуроға дейін өсті. Экологтар тойдың бір күніндегі саяхаттардың өзі 400 автомобиль шығаратын ластануға тең екенін есептеп шығарды.
ЮНЕСКО қорғауындағы Венецияның тарихи орталығына құрметпен қарауды талап ететін қозғалыстар мен ұйымдар тойға қарсылық білдірді. Олар қала билігінің тұрғындардың пікірін сұрамай, қаланы жалға беріп жібергеніне ашулы.
Қала бойынша «No Space for Bezos» («Безосқа орын жоқ») плакаттары ілініп, белсенділер Amazon негізін қалаушыға: «Егер сіз Венецияны тойыңызға жалға ала алсаңыз, көбірек салық төлей аласыз» деп үндеу тастады.
Джефф Безос пен Лорен Санчес қоғамдық пікірді ескеріп, жоспарларына өзгерістер енгізуге мәжбүр болды. Неке қию рәсімі 27 маусымда Сан-Марко алаңына қарама-қарсы орналасқан Сан-Джорджо-Маджоре аралындағы шіркеуде өтуі тиіс еді, бірақ оны орталықтан алыс, Арсенал ауданына ауыстырды.
«Біз жеңдік! Біз Безостың жоспарларын бұзып, мэр Бруньяроның «сарай ойындарына» нүкте қоя алдық. Венеция әлемнің күштілеріне ешқашан қызмет етпейтінін, керісінше бүлікшіл және қарсылық көрсетуші болып қала беретінін тағы да дәлелдедік», — деп жаңадан құрылған «No Space for Bezos» комитеті өз жеңісін осылай түсіндірді. Наразыларды толықтай тыныштандыру үшін жас жұбайлар қала қажеттіліктеріне жалпы сомасы миллион еуро болатын қайырымдылық жасады.