Қазақстанның мәдениет қайраткері, «Құрмет» орденінің кавалері дауыс беру учаскесіне келіп, азаматтық ұстанымын білдірді
Бүгін Қарасай ауданындағы сайлау учаскесіне Қазақстанның мәдениет қайраткері, «Құрмет» орденінің кавалері, белгілі әнші Өмірқұл Айниязов келіп, Құрылтайға қатысты өз таңдауын жасады.
Өнер иесі дауыс беру рәсіміне қатысып, ел өміріндегі маңызды қоғамдық үдеріске азамат ретінде өз үнін қосты. Оның айтуынша, әр азаматтың ел болашағына қатысты өз көзқарасы болуы маңызды.
«Бүгін азамат ретінде өз таңдауымды жасадым. Елдің ертеңіне қатысты әрбір мәселе баршамызға ортақ деп ойлаймын. Сондықтан осындай маңызды сәтте өз азаматтық ұстанымыңды білдіру – жауапкершіліктің бір көрінісі», – деді Өмірқұл Айниязов.
Белгілі әнші мәдениет пен өнердің қоғамдағы орнына да тоқталды. Оның пікірінше, өнер халықтың рухани өмірімен тығыз байланысты және кейінгі буынға құндылықтарды жеткізуде маңызды рөл атқарады.
«Өнер – халықпен бірге жасайды. Біз сахна арқылы ән мен дәстүрді ғана емес, елге деген құрметті, ұрпаққа деген аманатты да жеткіземіз. Сондықтан мәдениет пен өнердің дамуы әрдайым елдің болашағымен сабақтас», – деді өнер қайраткері.
Өмірқұл Айниязов Қарасай ауданында дауыс бере отырып, азаматтық белсенділікке мән берудің маңызын атап өтті. Оның пікірінше, қоғамның дамуы әр азаматтың өз міндетіне жауапкершілікпен қарауынан басталады.
