Күллі мұсылман қауымы күткен Құрбан айт мерекесінің басталуына санаулы күндер қалды. Бірлік пен береке, мейірім мен қайырымдылық салтанат құратын рухани мейрам биыл 27 мамырға сәйкес келеді. Бұл туралы Алматы облысының Өңірлік коммуникациялар қызметі алаңында өткен баспасөз мәслихатында айтылды.
Қазақстан мұсылмандары діни басқармасының шешіміне сәйкес, Арапа күні 26 мамырға тұспа-тұс келеді. Ал 27 мамыр — Құрбан айт мерекесінің алғашқы күні.
Алматы облысының бас имамы Мадияр Пірімқұловтың айтуынша, құрбан шалу рәсімі 27 мамыр күні айт намазы оқылғаннан кейін басталып, 29 мамыр кешкі ақшам намазына дейін жалғасады. Айт намазы облыс аумағындағы мешіттерде таңғы сағат 06:00-де оқылады.
Айт күндері жасалатын ең сауапты амалдардың бірі — құрбан шалу. Шариғат бойынша шамасы жеткен, балиғат жасына толған әрбір мұсылманға құрбан шалу міндеттеледі. Осыған байланысты өңірде арнайы 29 мал сою орны бекітілген.
Алматы облысы Дін істері басқармасының басшысы Ерғали Көшекенің мәліметінше, аталған нысандарға Қазақстан Республикасы Ауыл шаруашылығы министрлігі Ветеринариялық бақылау және қадағалау комитетінің Алматы облыстық аумақтық инспекциясы тарапынан тексеру жүргізіліп, олардың ветеринариялық-санитариялық талаптарға сәйкестігі жан-жақты зерделенген. Нәтижесінде барлық бекітілген орындар талапқа сай деп танылған.
Сондай-ақ, Құрбан айт кезінде санитариялық қауіпсіздікті қамтамасыз ету мақсатында мал сою орындарына жауапты ветеринариялық-санитариялық инспекторлар бекітілген.
Мамандардың айтуынша, мешіттер ветеринариялық бақылау нысандарына жатпайтындықтан, онда мал союға рұқсат етілмейді.
«Құрбандық шалу ветеринариялық бақылау және қадағалау талаптарына сай арнайы мал сою орындарында жүргізілуі тиіс», — деп атап өтті ҚР АШМ Ветеринариялық бақылау және қадағалау комитетінің Алматы облыстық аумақтық инспекциясының басшысы Даурен Тойбаев.
Құрбандық шалатын орындарға бірқатар санитариялық талап қойылады. Атап айтқанда, мал тек арнайы белгіленген орындарда сойылуы қажет. Сонымен қатар, тазалық талаптары қатаң сақталып, лас әрі шаң-тозаңды жерлерде мал союға жол берілмейді. Мал сою пункттерінде міндетті түрде су жүйесі болуы тиіс. Ең бастысы — сойылатын малдың ветеринариялық анықтамасы болуы шарт.
Алматы облыстық санитариялық-эпидемиологиялық бақылау департаменті басшысының орынбасары Алтынай Раймбекованың сөзінше, талаптардың сақталмауы сібір жарасы, бруцеллез, лептоспироз, сальмонеллез секілді қауіпті жұқпалы аурулардың таралуына себеп болуы мүмкін.
Мамандардың айтуынша, мұндай талаптар тұрғындардың денсаулығын сақтау, мал ауруларының алдын алу және азық-түлік қауіпсіздігін қамтамасыз ету мақсатында қабылданған
