Аудан аумағында ауыл шаруашылығы саласына шетелдік инвестиция тарту және заманауи агротехнологияларды енгізу бағытындағы жұмыстар жалғасуда. Осы мақсатта сәрсенбі күні аудан әкімдігінде Қытай Халық Республикасынан келген инвесторлармен кездесу өтіп, егін шаруашылығын дамытуға арналған жаңа инвестициялық жоба талқыланды.
Шетелдік кәсіпкерлерді Жамбыл ауданы әкімінің орынбасары Азамат Сұлтанов қабылдап, олардың ұсыныстарымен танысты. Кездесу барысында жобаны жүзеге асырудың негізгі кезеңдері, ауданның ауыл шаруашылығы әлеуеті, жергілікті мүмкіндіктер мен қолданыстағы заңнамалық талаптар жан-жақты қарастырылды.
Қытайлық инвесторлар Жамбыл ауданының аумағында заманауи агротехнологияларды пайдалана отырып, егін шаруашылығының жаңа бағытын дамытуды көздеп отыр. Атап айтқанда, жобаның алғашқы кезеңінде 1000 гектар алқапқа үпілмәлік өсімдігін егу жоспарланған. Бұл бастама жүзеге асқан жағдайда өңірдің ауыл шаруашылығын әртараптандыруға және жаңа инвестициялық мүмкіндіктерді игеруге жол ашпақ.
Үпілмәлік – әлемдік өнеркәсіпте кеңінен қолданылатын, экономикалық маңызы жоғары майлы дақылдардың бірі. Ғылыми атауы – Ricinus communis. Оның басты ерекшелігі – тұқымының майлылығы жоғары болуы. Ғылыми деректерге сүйенсек, өсімдік тұқымының шамамен 40–55 пайызын май құрайды. Одан алынатын кастор майы химия, фармацевтика, косметика және машина жасау өнеркәсібінде бағалы шикізат ретінде пайдаланылады.
Әсіресе, үпілмәлік майының техникалық қасиеттері ерекше. Ол жоғары сапалы жанармайлар, түрлі полимерлер, бояулар, қорғаныш жабындары және биологиялық негіздегі пластмасса өндірісінде қолданылады. Сонымен қатар косметикалық өнімдер мен фармацевтикалық препараттар әзірлеуде де маңызды орын алады. Өсімдік майының құрамындағы рицинол қышқылы оны басқа майлы дақылдардан ерекшелендіріп, өнеркәсіптік құндылығын арттыра түседі.
Үпілмәліктің тағы бір артықшылығы – оның азық-түлікке жатпайтын техникалық дақыл болуы. Сондықтан оны өнеркәсіптік мақсатта өсіру ауыл шаруашылығының жаңа бағыттарын дамытуға мүмкіндік береді. Дегенмен өсімдіктің өңделмеген тұқымында улы рицин заты кездесетіндіктен, оны өсіру, жинау және өңдеу кезінде тиісті қауіпсіздік талаптарын сақтау аса маңызды.
Жамбыл ауданында аталған дақылды өндірістік көлемде өсіру бастамасы жергілікті аграрлық сектор үшін жаңа мүмкіндік ретінде қарастырылып отыр. Әсіресе, ауыл шаруашылығына заманауи технологияларды енгізу, жер ресурстарын тиімді пайдалану және экспорттық әлеуеті бар өнім түрлерін көбейту тұрғысынан жобаның маңызы зор.
Инвесторлардың ұсынысына сәйкес, жоба жүзеге асқан жағдайда алғашқы екі жыл ішінде аудан экономикасына 1,5 миллиард теңге көлемінде инвестиция тарту жоспарланып отыр. Бұл – ауыл шаруашылығы саласына қосымша қаржы құйып қана қоймай, алдағы уақытта жаңа өндірістік бастамаларды дамытуға негіз бола алатын маңызды қадам.
Кездесу барысында аудан әкімінің орынбасары Азамат Сұлтанов өңірге инвестиция тарту, ауыл шаруашылығына озық технологияларды енгізу және жаңа жобаларды қолдау аудан әкімдігінің маңызды міндеттерінің бірі екенін атап өтті.
Сондай-ақ шетелдік кәсіпкерлерге инвестициялық бастамаларды қолданыстағы заңнама аясында жүзеге асыру үшін қажетті қолдау көрсетілетінін жеткізді. Ол үшін инвесторлар нақты бизнес-жоспар әзірлеп, жобаның экономикалық тиімділігін, өндірістік мүмкіндіктерін және оны іске асыру кезеңдерін толық таныстыруы қажет.
Атап айтқанда, алдағы уақытта жобаның жерге, су ресурстарына және қажетті инфрақұрылымға деген сұранысы, өсімдіктің жергілікті климат жағдайына бейімділігі, сондай-ақ дайын өнімді өткізу нарығы жан-жақты зерделенуі тиіс.
Жамбыл ауданы – ауыл шаруашылығын дамытуға қолайлы мүмкіндіктері бар өңір. Мұнда егін және мал шаруашылығы қатар дамып, аграрлық сала аудан экономикасының негізгі тіректерінің бірі болып келеді. Осы тұрғыдан алғанда, шетелдік инвесторлардың жаңа бастамаларға қызығушылық танытуы ауданның инвестициялық әлеуетіне деген сенімнің көрінісі деуге болады.
Кездесу қорытындысында тараптар ұсынылған жобаны одан әрі пысықтап, тиісті құжаттар мен нақты есептеулер негізінде ынтымақтастықты жалғастыруға уағдаласты.
Егер бастама толық жүзеге асса, Жамбыл ауданында бұрын кең көлемде қолға алынбаған техникалық дақылдарды өсіруге жол ашылып, ауыл шаруашылығы өндірісін әртараптандыруға жаңа серпін бермек. Ең бастысы, мұндай жобалар аудан экономикасының дамуына, инвестициялық тартымдылығының артуына және аграрлық саланың заманауи талаптарға бейімделуіне ықпал ететін болады.
Б.Айталы
