ТАЗА ҚАЗАҚСТАН: ҮЛГІЛІ АУЫЛЫНДАҒЫ ҮЛГІЛІ ІС

Республикалық экологиялық «Таза Қазақстан» акциясы аясында Жамбыл ауданының Жол картасына сәйкес кезекті сенбілік жұмыстары ұйымдастырылып, Үлгілі ауылдық округіне қарасты Үлгілі ауылының Тұрлашов көшесінде ауқымды тазалық шаралары жүргізілді. Бұл бастама – ел көлемінде жүзеге асырылып жатқан игі істің жергілікті деңгейде нақты көрініс табуының айқын дәлелі.
Сенбілік барысында ауыл тазалығын сақтау және қоршаған ортаны қорғау мақсатында жүйелі жұмыстар атқарылды. Атап айтқанда, көше бойы толықтай тазартылып, шашылған тұрмыстық қалдықтар жиналды, жол жиегі ретке келтірілді. Жиналған қоқыстар арнайы белгіленген орындарға шығарылып, санитарлық талаптарға сай жұмыстар жүргізілді. Іс-шараға 15 тұрғын белсенді қатысып, 1 арнайы техника жұмылдырылды. Бұл – ұйымдасқан еңбектің және ортақ іске деген жауапкершіліктің нақты көрінісі.
Осындай сенбіліктердің маңызы зор. Біріншіден, ауылдың санитарлық жағдайы жақсарып, тұрғындарға қолайлы орта қалыптасады. Екіншіден, экологиялық мәдениет қалыптасып, әрбір азаматтың табиғатқа деген жанашырлығы арта түседі. Үшіншіден, мұндай шаралар ауыл тұрғындарын бірлікке, ұйымшылдыққа тәрбиелейді.
Айта кету керек, тазалық – тек бір күндік шара емес, ол күнделікті өмір салтына айналуы тиіс. Әрбір тұрғын өз ауласының, өз көшесінің тазалығына жауапкершілікпен қарағанда ғана ауылымыз көркейіп, өмір сүруге қолайлы мекенге айналады. «Таза Қазақстан» акциясы – тек қоқыс жинау емес, ол – сананы жаңғырту, қоршаған ортаға деген көзқарасты өзгерту.
Үлгілі ауылында өткен бұл сенбілік – өзге елді мекендерге үлгі боларлық игі іс. Алдағы уақытта да осындай шаралар жалғасын тауып, ауқымы кеңейе беретініне сенім мол. Туған жердің тазалығы – әрбір азаматтың парызы екенін ұмытпайық. Үлгілі ауылдық округ әкімі М.Абдыкаримов.
Таза орта – ортақ жауапкершілік! Табиғатты қорғау – болашаққа қамқорлық!
#ТазаҚазақстан #ТазаОрта #ЖамбылАуданы