Елімізде 2026 жылғы 23 тамызға белгіленген Құрылтай сайлауына дайындық жұмыстары қарқынды жүргізілуде. Қазіргі таңда сайлау науқанының маңызды кезеңдерінің бірі – сайлауалды үгіт жұмыстары жалғасып жатыр. Заңнамаға сәйкес, үгіт-насихат кезеңі 21 тамыз күні сағат 18:00-де аяқталады. Ал 22 тамыз – үнсіздік күні болып белгіленген.
Сайлауалды үгіт барысында үміткерлер мен оларды ұсынған ұйымдар өздерінің сайлауалды бағдарламаларын халыққа таныстырып, кездесулер өткізіп, бұқаралық ақпарат құралдары мен интернет ресурстары арқылы сайлаушыларға өз ұстанымдары мен бастамаларын жеткізуде. Бұл кезең азаматтардың үміткерлердің көзқарасымен танысып, саналы таңдау жасауына мүмкіндік береді.
Сайлау комиссиялары өз кезегінде дауыс беру учаскелерінің дайындығын қамтамасыз етіп, сайлау заңнамасының талаптарының сақталуын бақылауда. Сонымен қатар сайлаушыларға дауыс беру тәртібі түсіндіріліп, ақпараттық-түсіндіру жұмыстары жүргізілуде.
Қазақстан Республикасының заңнамасына сәйкес, сайлауалды үгіт жұмыстары заң аясында, барлық үміткерлер үшін тең мүмкіндіктер қағидаты негізінде ұйымдастырылады. Азаматтардың еркін таңдау жасауына ешқандай кедергі келтірілмеуі тиіс.
22 тамыз – үнсіздік күні. Бұл күні кез келген үгіт жұмыстарына, үгіттік материалдарды таратуға және сайлаушыларды белгілі бір үміткерді қолдауға шақыруға тыйым салынады. Үнсіздік күні сайлаушылардың сыртқы ықпалсыз, байыппен шешім қабылдауына жағдай жасауға бағытталған.
Ал 23 тамызда еліміздің азаматтары дауыс беру учаскелеріне барып, өз таңдауларын жасайды. Құрылтай сайлауы – қоғамның пікірін білдіруге, елдің қоғамдық-саяси дамуына үлес қосуға мүмкіндік беретін маңызды саяси науқан.
Әрбір дауыс – ел болашағына деген жауапкершіліктің көрінісі. Сондықтан сайлауға белсенді қатысу – әрбір азаматтың азаматтық ұстанымы мен қоғамдық жауапкершілігінің маңызды белгісі.
